აკაკი წერეთელი - მინდა რამ ვთქვა Print E-mail
ავტორი ვებ-მასტერი   
სამშაბათი, 29 დეკემბერი 2009 20:56

მინდა რამ ვთქვა, მაგრამ რა ვთქვა,

უსამართლოდ ალაგმულმა?

ჩემი გრძნობა უნდა უხმოდ

შიგ ჩაიკლას წყლულმა გულმა!


მე ამ ლაგამს წავიძრობდი,

არ მაქვს უცხოს მორიდება;

მაგრამ რა ვქნა, რომ ხელმარჯვედ

ჩემივე ძმა მეჭიდება!


იმის აზრი სულ სხვა არის

და სულ სხვას გრძნობს ჩემი გული;

მე სხვა რამე მენატრება, -

მაგას ჯილდო, ანუ ფული!


ეჰ, რა მეთქმის? მირჩევნია

უხმოდ მოვკლა გრძნობა გულში

და არვის კი არ მივყიდო

არც ჯილდოში და არც ფულში!..


1880 წ.